اصدرت دارك سولز 3 هذا الشهر وهي الجزء الأخير من السلسلة ، طبعاً المعروف أنه سلسلة دارك سولز تعجيزية أقصد بيكون فيها مستوى تحدي عالي، لكنها بالوقت نفسه ممتعة جداً وتقدم تجربة.

اذا كنت ضايع من اللحظة الأولى (خصوصاً اذا الحين بتجرب السلسلة لأول مرة) أو مش فاهم من وين تبدأ ووين تروح ووين راح تنتهي، هذي بعض النصائح راح تساعدك وأنت تلعب اللعبة،

1- اذا مافهمت قصة السلسلة..

ما ألومك لأنه عالم اللعبة ضخم وراح تلاقي الكثير من التفاصيل والأشياء والمناطق السرية، باختصار قصة دارك سولز معقدة جداً وكثير من اللي يلعبونها ما يدرون ايش اللي قاعد يصير.

بالنهاية حاول تفهم أكبر قدر ممكن من القصة وأتوقع عدم فهمك الكامل للقصة ماراح يأثر على تجربتك باللعبة.

2- خايف إنها تكون صعبة؟

صعبة لكنها ما تظلمك لأن اللعبة جداً عادلة، راح تلاقي نفسك تتعلم من أخطائك مرة بعد مرة، يعني راح تموت كثير لكنك راح تتعلم من أخطائك ويزيد حماسك أكثر..

3- خلك صاحي

خلك صاحي ومستعد لاتخاذ قراراتك بسرعة لأنه ممكن بأي لحظة يجيك عدو ما تدري من وين، ترى الأعداء متنوعين بشكل كبير في هذا الأجزاء ومستوى صعوبتهم مرتفع.

4- خلك ذكي في استخدام الأسلحة 

من أهم الأشياء في دارك سولز نوع السلاح اللي تستخدمه والمكان والزمان المناسبين له، مثلاً الأسلحة الكبيرة ماتنفع في المناطق الضيقة (الأسهم تفيدك أكثر)، حاول تصنف أسلحتك بأنك تختار لكل عدو أو قائد أكثر سلاح ينفع معاه وهذا الشي بيكون بالتجربة والتركيز على نقاط ضعف العدو.

5-الكمائن

اتبع المثل مو كل شيء يلمع ذهب، يعني راح تلاقي أشياء تلمع تروح لعندها وتكتشف أنك صرت بمعركة مش حاسب حسابها، أو راح توقع من حفة وتلاقي كمائن، أهم شي انتبه وحاول تحصل صناديق الحياة والغنائم.

6- لا تقتل أي أحد تشوفه

عالم اللعبة قاسي ويمكن تكره نفسك، بالمختصر كن حذر ولاتقتل أي أحد تشوفه لأنه بعض الأشخاص ممكن يقدمون لك مساعدة كبيرة ويعطونك معلومات ثمينة جداً، بالمقابل راح تلاقي أشخاص يخدعونك مثل أنه أحد يتحول فجأة لعدو مندس ويقتلك.

7- لا تتوتر بل خطط لهجماتك

التوتر ممكن يصاحبك خصوصاً وقت تواجه قائد ضخم أو تنين يقدر يقتلك بضربة واحدة، أهم شي ماتفقد تركيزك وحاول تختار الوقت المناسب علشان تهجم واطلب مساعدة لاعبين آخرين (إذا كنت تلعب أونلاين).

8- لا تيأس 

يمكن تموت عند قائد مرة ومرتين وعشرة وعشرين (الله أعلم كم مرة) لكن في كل مرة راح تتعلم أكثر وتكسب تجربة، اتعب على نفسك حتى لو شعرت انك عاجز أو وصلت لمرحلة الطفش لأنك راح تتحسن أكثر مع الوقت لدرجة أنك بتتفاجئ بسهولة الأماكن اللي كنت تموت عندها مرات ومرات.

9- طور نفسك باستمرار 

حاول تشتري أسلحة ودروع جديدة ومب غلط إذا أعدت بعض الأماكن السهلة عشان تكسب نقاط خبرة أكثر لأن اللعبة تدريجية في صعوبتها، يعني لازم تطور أسلحتك ودروعك باستمرار.

أخيراً.. شخصياً أعتقد إنه دارك سولز 3 (أو بلودبورن الحصرية على البلاي ستيشن 4) مناسبين لك لو كنت تريد تدخل هذي الأجواء لأنهم نسبياً أسهل من أجزاء دارك سولز السابقة ومع رسوم أفضل.