فى حاجة مهمة جدا أى حد بيفكر فى الدايت لازم يعملها قبل أصلا ما يفكر يعمل دايت ألا وهى تنظيم مواعيد الأكل. الجسم بطبيعته بيلجأ لتخزين الدهون لأنه بيحس انك مجوعه بسبب عدم انتظام مواعيد الأكل. اللى بيحصل ببساطة ان الجسم بتيجى عليه أوقات بيكون محتاج عناصر غذائبة معينة فى وقت احنا مش بناكل فيه, فكوسيلة دفاعية بيبدأ فى تخزين الدهون, وعملية تخزين الدهون دى بتتوقف أول لما مواعيد الأكل بتتظبط, لأن فى الحالة دى كل احتياجات الجسم من العناصر الغذائية هتوصله فى ميعادها.

لو وزنك فوق 80 كيلو يفضل ان الأكل يكون كل 3 أو 4 ساعات بكميات قليلة, ده هيحفز الجسم انه يوقف عملية تخزين الدهون, وبعد ما نتعود على المواعيد الجديدة للأكل ممكن ساعتها نبدأ الدايت مع الالتزام بنفس المواعيد. أما لو الوزن تحت 80 كيلو ممكن نخلى الوجبات كل ست ساعات أو 3 مرات فى اليوم بس فى مواعيد منتظمة.
الأسلوب ده مش بس بيوقف عملية تخزين الدهون, لأ ده كمان بيرفع الميتابوليزم او معدل الحرق وفى ناس كتير بتخس بالطريقة دى بدون الإلتزام بدايت معين.